Novitads
<< enavos
PlayFestas: Ina plattafurma, uras plain divertiment
Cultura populara è ina part impurtanta da Radiotelevisiun Svizra Rumantscha (RTR). In accent metta l’emettur da l’SRG sin chors e lur musica. Mintga mardi saira datti d’udir musica da chors sin Radio RTR. E gia dapi decennis è l’emettur preschent a festas da chant e concurrenzas – surtut en Grischun – e registrescha là bleras chanzuns e represchentaziuns. Per che las registraziuns na fan betg pulvra en l’archiv, metta la redacziun da musica online ellas, sin sia plattafurma «PlayFestas».
Registraziuns cun scharm
En il fratemp datti sin «PlayFestas» ina gronda selecziun da musica da chors: Sper intgins concerts chattan ins er 48 festas da chant e concurrenzas – surtut dal Grischun. Novas registraziuns vegnan adina puspè vitiers. Las pli novas registraziuns èn da la festa da musica districtuala 2023 a Müstair, las pli veglias da la festa da chant 1969 a Roveredo.
Las veglias registraziuns èn qualitativamain bunas e sa laschan cumparegliar cun registraziuns novas. Ellas han dentant qua u là in pau dapli scharm. Tar festas da chant vegniva pli baud savens chantà dador. Perquai audan ins qua u là il vent u il tschivliez d’in utschè.
Simpla utilisaziun, blera inspiraziun
«PlayFestas» è fabritgà si fitg simpel. Sin la pagina iniziala vegnan preschentadas las differentas festas da chant. Cun in clic sin ina festa vegnan ins tar las registraziuns. Qua pon ins er selecziunar tenor categoria u regiun dals chors. Tut quai funcziuna fitg intuitiv.
La selecziun da las chanzuns è grondischma, betg mo da chanzuns rumantschas. I dat dentant in egl ch’intgins classichers vegnan chantads tar bunamain mintga festa. Spezialistas u spezialists pon pia tschertgar vinavant suenter la versiun perfecta da «La sera sper il lag» ubain «Sut steilas». Tar la gronda selecziun chatta dentant mintga persuna insatge che plascha – u forsa er ina u l’autra chanzun per il proxim program da l’agen chor.
Dal rest: Sin «PlayFestas» na datti betg mo chanzuns da chors, dentant er ina gronda selecziun da concerts dad ensembles, orchesters e societads da musica.
Link a la plattafurma «PlayFestas»:
www.rtr.ch/playfestas
Flurin Clalüna
