Novitads
<< enavos
Uschia chattais Vus la storta tar las taxas da la SUISA tar videos online
Vulain nus chargiar in video sin la pagina d’internet, pertutga quai trais dretgs: Il dretg da crear in video da musica (Tariffa VN-B), il dretg da far accessibel in video ad in public (Tariffa MOW: Music on Websites), ed il dretg da sincronisaziun, pia da colliar il toc da musica cun maletgs.
Supponin ina giada, che jau sun la presidenta dal chor da dunnas «Singfreude» e nus vulain publitgar sin nossa pagina d’internet in video, nua che nus chantain il toc «Für immer uf di» da Patent Ochsner. Tge stuain nus far tut?
Impurtant è da savair che nus stuain pajar licenzas per ovras da qualas ils auturs vivan anc ubain èn morts avant pli pauc che 70 onns. Tut las autras ovras tutgan tar la domena publica – tutgan pia a la generalitad e pon vegnir duvradas libramain. En cass da dubis vegn dentant recumandà da dumandar suenter tar la SUISA. En noss cas èsi cler: il cumponist Büne Huber viva anc e va cun sia band Patent Ochsner sin tura tras la Svizra. Nus stuain pia pajar taxas.
Tge stuain nus pia far per indemnisar tut ils dretgs necessaris? Qua datti in mussavia, pass per pass:
Dretg da crear in video
1. Nus giain sin la pagina www.suisa.ch. Qua datti duas pussaivladads da cliccar, «Musikwerke anmelden und verwalten» (per cumponist:as) e «Musiknutzung melden und lizenzieren»: Nus cliccain sin quella opziun, «Musiknutzung melden»
2. Nus scrollain in pau engiu e selecziunain ord il menu «Audio- und Filmproduktion» e suenter «Videos für Online-Ausstrahlung oder firmeninternen Gebrauch».
3. Nus fain in clic sin l’opziun «Lizenz beantragen / Online Formular». Qua inditgain nus las datas da contact e las infurmaziuns davart il toc da musica.
Tariffa
Sche Vus cliccais en il formular, vesais Vus survart, sut il titel, «Tarif» en cotschen. Qua datti las infurmaziuns davart la tariffa. Sut il punct 15.3.1 sin la pagina 6 vesais Vus la tariffa per «Andere Tonbildträger». Per in budget da producziun da fin 2'500 francs pajan ins pauschal CHF 50.- pro video. Videos da chors laics vegnan per gronda part ad esser en quella categoria. Vus pajais pia per la creaziun pauschal CHF 50.- pro video. Il text da tariffa VN chattais Vus er sin la pagina tar la rubrica «Dokumente».
Dretg per far accessibel in video:
Per medias socialas na dovri nagina licenza per far accessibel in video. Dentant: Sch’ins publitgescha in video sin l’atgna pagina d’internet, sto il chor pajar per la licenza per far accessibel il video. Quella tariffa vegn numnada MOW (Music on Websites).
Perquai pon ins inditgar tar las remartgas sin la terza pagina dal formular ch’ins ha emplenì or per la tariffa VN-B, ch’ins vul er cumprar la licenza MOW.
Tariffa
Per in video pajan ins CHF 100.- pro onn. I dat ina purschida pauschala da la SUISA che sa renda a partir d’in video: Per il far accessibel videos pajain nus il meglier pauschal CHF 120.- per 1 fin 10 videos pro onn.
Dretg da sincronisaziun
Il dretg da sincronisaziun dad in toc da musica vegn administrà da la chasa editura. Perquai scrivain nus in mail a repertoire@suisa.ch. La SUISA trametta suenter – sche la chasa editura è da la Svizra – la dumonda directamain a la chasa editura ed infurmescha lur la persunas ch’ha fatg la dumonda. Tenor la collavuratura da la SUISA Nasir Jamir vegnan las dumondas per regla adina approvadas e la licenza è gratuita. Tar chasas edituras da l’ester fat la SUISA or las datas da contact. La dumonda a la chasa editura va dentant sur il chor.
Dapli infurmaziuns datti sin la pagina d’internet da la SUISA. Là datti er infurmaziuns da contact sch’ins ha dumondas.
https://www.suisa.ch/de/
Bild: Palma Fiacco
Isabelle Schmied
