Novitads
<< enavos
Rezia Cantat: Calore, musica e dolce vita
La pitschna citad era emplenida. Schon dapi mais è mintga chombra a Chiavenna reservada. E la bell’aura procura per anc dapli osps. Ils cafes ed ustarias eran plainas, nagin ‘gelato’ senza star en colonna. Era las giassas eran emplenidas. Tgi che vuleva ir dad in lieu a l’auter, stueva planisar en tschintg minutas dapli pel viadi.
Tut la citad era ina tenda da festa. Mintga pèr meters sa auda in auter chor, tgi fa viva cun chantar “Inviva” ni ch’els vulan mussas als auter chors, ch’els san era chantar dad aut. Fatschas marmugnusas sa vesa paucas. Chantadurs cun differents logos sin lur chamischas sa salidan, raquintan da lur represchentaziun e fan lura viva. Il proverbi e motto da la festa «musica unescha» sa pudeva per ina giada era vesair.
Vischins talians
La sonda saira aveva lieu l’emprim concert da gala. Sin il program: il chor da giuvenils talian e nus, il chor da giuvenils Grischun. Dus chanzuns chantavan nus ensemen. Perquai avevan nus quindesch minutas temps per far prova. Durant ch’ils dus dirigents discutavan detagls musicals, sa emprendevan il chor ad enconuscher. Sche betg sin taglian, lura halt sin englais. Quant bleras provas ha tschel chor, danunder vegnan els - Smalltalk tranter ils chors.
Suenter in’ura, il concert. Nus stevan pronts, anc in per commentaris, lura annunziava il moderatur al “Corale Giovanile Grigione”. Suenter ina mes’ura chant Grischun eran ils collegas da l’Italia vidlonder. Schon l’emprim accord traglischava, ins badava, quel chor è bun. Il chor taglian chantava musica classica, da Bach fin Gabrieli – musica classica, be dal pli bun. Tadlar tiers è dentant in toc pli strapatschant che nossa musica da divertiment. Ma era per els deva ina standing ovation.
Alla prossima volta!
Per ils tocs communabels gievan nus anc ina giada en il chor da la baselgia. Suenter l’emprima chanzun surrieva il bassist sper mai. N’ha jau chantà fauss, n’ha jau dumandà. Na, i fetschia simplamain grond plaschair da chantar ensemen, sia resposta. Durant il segund toc “La sera sper il lag”, stueva era jau surrir. Tar l’applaus in sguard a dretga, in segn cul chau ed anc in surrir.
Enavos en la gardaroba. Mintga chor splattava anc ina giada per l’auter. Per finir, “Ooohhh”: ina unda La-Ola. Suenter sun els ids a mangiar, nus tschertgavan plazzas libras en las ustarias. Jau avess gugent chantà anc in pèr chanzuns cun il chor taglian e discurrì anc in pau cun els. Al bassist pudeva anc dir a revair: «Grazie mille e alla prossima volta».
Foto: RTR/ Dominik Hardegger
Flurin Clalüna
