Dirigent tschertga chor
<< enavos
Intervista cun Lukas Bolt (LB), commember da la suprastanza da l’USC (ressort musica) ed anteriur president a la cumissiun da musica
Tge era il motiv per la schliaziun da la cumissiun da musica e da la fundaziun dal Sounding Board (SB)?
LB: Nus da la cumissiun da musica ans avain giavischà dapli influenza. Fin uss n’avain nus gì nagina pussibilità uffiziala d’influenzar il svilup da l’USC. Cun il SB essan nus pli agil e betg dependents dad auters organs, sco il ZV ubain la DV che vegnan mo ensemen mintga mez onn u perfin be mintga dus onns. Nus na pudain betg decider insatge, dentant avain nus la pussibilità da purtar en novas ideas, far dumondas criticas e da preschentar nossa opiniun.
Da nov vegnan er las incumbensas da la cumissiun da musica (sco la cun-organisaziun da festas da chant ubain il champ d’expert:as) betg pli repartì intern, dentant surdà da la suprastanza via mandar. Uschia pon las lavurs vegnir repartidas pli svelt, concret e pli gist (per exempel quai che pertutga remuneraziun).
È en il SB surtut represchentà la vusch da dirigent:as?
Ella è ina part da quai atras la represchentanza d’expert:as e dirigent:as. A nus ha dà in egl che lur vusch aveva fin uss memia pauc pais. Cun ina basa pli lada duai quella uss vegnir represchentada pli eguala. En il SB èn dentant er persunas ord la direcziun ubain ord uniuns da chors ch’han plitost in punct da vista da l’organisaziun.
Co vegnan elegi:das ils/las commembr:as?
Las singulas gruppaziuns dal SB proponan persunas interessadas che vulan seser en quest gremi. La direcziun da l’USC ha lura l’incumbensa da controllar, sche quai correspunda als criteris per la cumposiziun dal SB (egualitad tranter ils genders, vegliadetgna e represchentants da tut las regiuns linguisticas). Lura vegnan las persunas nominadas. En il SB vegnan a seser var diesch persunas. La cumposiziun da la commembranza sa po adina puspè midar. Uschia essan nus pli agils cun quai che nus n’essan betg dependents dad in ritmus da quatter onns.
(Remartga: Guarda skizza SB sin la pagina d’internet da l’USC)
Co vesa or l’urari? Cura ha lieu l’emprim inscunter?
Las singulas gruppas vegnan a proponer lur persunas fin suenter las vacanzas da stad. La direcziun vegn fin la fin da settember a decider davart la cumposiziun dal SB. In emprim inscunter è previs per enturn la fin da l’onn.
Tge èn tia speranzas cun il SB, tge è tia visiun?
Jau sper da survegnir dapli sustegn. Fin uss avain nus adina gì differentas gruppas d’interess che vegnan be ensemen a la radunanza da delegada. Quai era dentant ina radunanza bler memia gronda per pudair propi discutar in cun l’auter. Cun il SB vul jau avair in lieu, nua ch’ins po discutar da principi davart tut. Las decisiuns van anc adina sur il ZV ubain la DV, dentant ils inputs per midadas e nov vent arrivan bler pli direct. La finamira è d’avair ina uniun da chors nua che tuts tiran vid la medema suga.
Datti gia temas concrets che ti vuls discutar en il SB?
Il chomp d’expert:a ed il perfecziunament da dirigent:as e chantadur:as èn dus temas nua ch’i sa mida actualmain bler. Quels vul jau purtar en en il SB. E la structura actuala da l’USC vegnan en in proxim pass reponderads e sviluppads vinavant en il ZV. Là po il SB purtar en il punct da vista da las musicist:as e proponer agens inputs. Jau ma legrel sin quella discussiun e jau sun spanegià sin ils differents puncts da vista. E natiralmain sun jau er spanegià sin ils temas da las autras persunas en il SB.
