Dirigent tschertga chor
<< enavos
Quo vadis, USC?
Per ils ins era la radunanza quasi davant porta-chasa, auters stuevan anc far in pèr kilometers: Ils 8 da zercladur 2024 èn sa scuntradas var 40 represchentant*as da las uniuns chantunalas a Lucerna a la scol’auta da musica per discutar davart il futur.
In program spess ha spetgà: Suenter in curt bainvegni è la glieud sa repartì sin trais gruppas per discutar davart il stan actual da l’USC. En il decurs dals discurs è sa mussà che bleras purschidas da l’USC vegnan stimadas fitg: purschidas enturn las contribuziuns da la SUISA, il champ d’experts (e co che quel duess vegnir restructurà) ed il patrunadi da las festas e concurrenzas da chant svizras èn vegnidas menziunadas spezialmain. Er chavazzins sco «rait da contacts» e «represchentanza politica» paran d’esser impurtants.
Suenter quai han ins discutà davart il futur: Tge duain ins mantegnair? Tge dovri nov? E: Tge na dovri betg pli? Qua è vegnì discutà a moda fitg differenta en las gruppas. Cler èra surtut in: «Il pli impurtant per ils singuls chors – e cun quai er quai che collia entaifer l’USC – è il chant! »
Suenter ina curta runda en il plenum, nua che las gruppas èn sa barattadas or ed han rimnà ils chavazzins. Suenter in gentar èsi cun novas forzas ì vinavant. Il suentermezdi gieva surtut per la rolla da las uniuns chantunalas: Tge èn lur basegns, lur rolla e las incumbensas da las uniuns chantunalas? Co vesa en futur or la suprastanza centrala? Ed er davart las finanzas è vegnì discutà.
Ina giada dapli è sa mussà tar bleras persunas il giavisch d’avair ina buna colliaziun cun la basa: «Las uniuns chantunalas èn la pli impurtanta colliaziun tar ils chors e chantadur*as» era il facit da sia runda. Plinavant èn vegnids exprimids blers giavischs ed ideas, ch’èn tuttas vegnidas notadas.
A la fin eri anc temp per in ultim barat. Suenter ina nova runda da preschentaziun da las gruppas, han Dr. Claudia Kaufmann e Christof Ramseier (president USC) infurmà davart il proxims pass: Ina gruppa accumpagnanta ord la suprastanza da l’USC e glieud da questa dieta vegnan ils proxims mais ad elavurar il program (sin basa dals resultats da questa radunanza) per il proxim inscunter il november. Il tem da quel di vegn ad esser: L’organisaziun e structura da l’USC. Ins po restar plain mirveglias.
