Novitads
<< enavos
23avla radunanza da delegad*as da l’USC e forum da delegads
En tschintg workshops sut la batgetta da commembers da la direcziun avevan delegadas e delegads la pussaivladad d’exprimer lur quitads davart corona e la lavur da l’uniun. La discussiun ha mussà che bleras uniuns han gì da cumbatter cun extradas e cun sfidas finanzialas. Bleras e blers han exprimì in giavisch da dapli sustegn da l’uniun tetgala.
La situaziun dals chors atras corona
Durant la crisa da corona han ils chors stuì cumbatter cun sfidas logisticas, organisatoricas, finanzialas e socialas. Far provas cun mascrina n’era per intgins chors nagin problem, auters han perquai interrut las provas. Plinavant n’èsi betg stà simpel d’organisar e manar atras bunas provas cun mo 15 persunas. Tar blers chors hai dà extradas pervia da la situaziun speziala. Perquai ch’er concerts eran scumandads mancan las entradas. Blers chors han bain survegnì daners ord l’assicuranza cunter la dischoccupaziun, dentant betg tuts. Blers han pudì profitar dals daners supplementars da l’Uffizi federal per cultura.
Ord vista da las dirigentas e dirigents hai en blers lieus dà problems cun lur pajas. Intgins chors n’han betg pajà ils onuraris da las dirigentas e dirigents. Problematic eran per part ils contracts – surtut là, nua ch’il onurari vegn pajà tenor preschientscha u tenor tariffa da paja per ura. Intginas dirigentas e dirigents avessan giavischà dapli sustegn finanzial e dapli sustegn cun far provas en ina furma alternativa.
Sper las sfidas cun il coronavirus han differents chors en menziunà quant creativ ch’ins ha reagì per part. Intgins chors han organisà provas ibridas – pia ina part chanta al lieu, il rest sa participescha sur zoom. Per part eran ils chors sa repartids sin differents locals ed eran collidads via zoom. En ils workshops han ins plinavant intunà, quant impurtant ch’igl è d’organisar puspè occurrenzas. Uschia eviteschan ins ch’i dà memia bleras extradas e la vusch vegn, suenter quel lung temp senza chantar, puspè ina giada trenada. Er davart las pajais hai dà bunas cunvegnas. IntginAs dirigentAs han prendì mo ina part da lur paja, en auters lieus han las commembras e commembers pajà ina pli gronda contribuziun.
Lavur d’uniun e festas da chant
Las participantas e participants han er discutà, sch’i dovra novas structuras en las uniuns chantunalas ch’èn tradiziunalmain partidas si en districts. En blers districts èsi adina pli difficil da chattar persunas che vulan surpigliar responsabladad. Plinavant han ins discutà davart pussaivladads da promover chors d’uffants e da giuvenils e sch’ins pudess liar las uniuns da musica da baselgia a las uniuns da chant chantunalas. In grond desideri d’infurmaziuns e d’optimaziun è sa mussà surtut tar temas generals sco il know-how da manar ina uniun, co communitgar bain cun ils commembers, l’obligaziun da realisar mesiras ed il tegnair en las ierarchias entaifer las uniuns. Plinavant regna in grond desideri da sustegn tar dirigent*as en la situaziun d’urgenza actuala.
Festas da chant sin nivel federal, chantunal e regiunal sajan dentant fitg impurtantas e betg remplazzablas, ha mussà la discussiun. Las festas promovan il barat cun auters chors e chantaduras e chantadurs han la schanza da sa preschentar ad auters chors, experts ed in pli grond public. Per chantar ensemen cun ils auters chors sajan ils Songbooks fitg bainvesids.
Nova glieud en la direcziun e reducziun da las contribuziuns dals commembers
Tut las persunas en la direcziun èn vegnids reelegidas. Cun Franziska Welti e Markus J. Frey è la suprastanza schizunt creschì in pau. Els dus èn dirigent*as renumnadas ed èn bain ancrads en la scena. La funcziun da president da la cumissiun da musica surpiglia da nov Lukas Bolt, dirigent da la Svizra orientala. El è schon plirs onns en la cumissiun. Plinavant han ins decidì da smesar las contribuziuns dals commembers dal 2021 – quai pervia da la pandemia da corona. Er las contribuziuns a la SUISA vegnan sbassadas cleramain. Da nov surpiglia l’USC la contribuziuns da commembras per chors ed ensembles cun in background sozio-cultura.
Ils dus novs commembers en la direcziun :
Franziska Welti è chantadura, pedagoga da chant, artista e dirigenta en Svizra ed en l’ester. Ella ha schon survegnì plirs premis, sco per exempel il 2009 il premi da cultura da la citad da Winterthur u 2018 ina contribuziun da reconuschientscha dal chantun Turitg. Dimoras da studi han manà ella a Londra, Berlin, Odessa e Nairs. Ella viva a Winterthur ed a Berlin.www.franziskawelti.ch
Markus J. Frey è chantadur, magisters ed ha fatg pliras scolaziuns sco dirigent da chors ed orchester. Actualmain dirigia Markus J. Frey il Chor da baselgia Berikon, il chor da baselgia cantemus a Rafzerfeld e l’orchester Zofingen. Plinavant è el president da l’Uniun svizra da chant da baselgia. www.frey-musik.ch
Isabelle Schmied (Traducziun : Flurin Clalüna)
