Novitads
<< enavos
Lavur gartegiada en l’uniun #4 Fundraising
Tenor il fegl d’infurmaziun dal post spezialisà Vitamin B per uniuns datti duas spartas da rimnar daners: Dad ina vart contribuziuns da promoziun dal maun public e fundaziuns, da l’autra vart sponsoring, nua ch’i dat ina fatschenta da cuntrapart cun il sponsur. En quest artitgel vai surtut per l’emprima varianta. Latiers datti bleras differentas metodas per survegnir sustegn. Ina varianta fitg simpla è, da rimnar donaziuns da persunas singulas, per exempel durant occurrenzas, via Crowdfunding ubain cun ina dumonda en scrit. Tut tenor project pon ins er augmentar temporalmain la contribuziun da las commembras e commembers. Impurtant è, ch’i vegn planisà baud avunda.
Da rimnar sustegn finanzial da fundaziuns, il maun public (Vischnanca, Chantun, eventual Confederaziun) sco er firmas pli pitschnas èn la varianta la pli enconuschenta. Quella via sa chaschunar blera lavur, sa dentant er generar grondas contribuziuns finanzialas.
Chattar sustegn en la regiun
Empermettend success è, sch’ins dumonda tar adressas en la regiun e/ubain ch’han in connex cun il tema. Uschia ha l’Uniun da chors da la Svizra centrala CIS regularmain success cun dumandar suenter tar il Pertschient da cultura da la Migros. Tenor Andreas Hofstetter, anteriur president chantunal ed uss responsabel per la communicaziun dal CIS, hajan ins pudì realisar atras quai festas da chant, il LUGA-Singen u occurrenzas per uffants e giuvenils. Sco che Vreni Lins, presidenta da l’Uniun chantunala da chant dal Glaruna (GLKGV), di, survegnan ils chors er savens daners dal fonds da lottaria (nivel chantunal). L’Uniun chantunala da Glaruna survegnia da la Regenza 2'000 francs per sia participaziun annuala a la «Näfelser Fahrt».
Er firmas localas pon sustegnair in project cun ina contribuziun. Imports pitschens datti savens, sch’ins numna la firma en il carnet da programm, uschia André Callegari, possessur da l’agentura «Stadtpark Südwest» per fundrising e communicaziun. L’Uniun da chors da la Svizra centraja haja schon pliras giadas survegn?i daners da firmas localas. Per occurrenzas spezialas tschertga il GLKGV firmas, che vulan inserar en il carnet da festa – e che fan uschia ina contribuziun finanziala.
I vegn er recumandà, da dumandar tar fundaziuns localas e regiunalas. Fundaziuns naziunalas dattan darar daners per projects regiunals. Tar il Register federal da fundaziuns, Fundraiso e StiftungSchweiz ubain tar registers chantunals chattan ins numerusas adressas. Plinavant pon ins filtrar tenor differents criteris. Fundaziuns regiunalas vegnan, tenor Vitamin B, savens administradas da las bancas chantunalas.
Engaschament vegn remunerà
Far fundraising chaschuna lavur. «L’impundiment datti cun dumandar tar tut las instituziuns. Deplorablamain n’è il retgav betg dapertut il medem. Sch’ina instituziun na sa betg s’identifitgar cun in project, lura na datti per regla er nagin sustegn», uschia Andreas Hofstetter. Ed André Callegari manegia: «Fundaziuns survegnan adina numerusas dumondas. Dumondas betg cumplettas u betg formuladas optimalmain han strusch schanzas». Impurtant da resguardar saja er, che fundaziuns pli pitschnas elavureschan mo ina fin duas giadas l’onn las dumondas.
Sch’ina dumonda è cumpletta e bain formulada, lura saja «il success sur curt u lung temp – e fundraising dovra temp – probabel.» L’Uniun svizra da fundaziuns «SwissFoundations» ha perquai mess a disposiziun in mussavia per «La dumonda perfetga».
Tge tips da success datti?
Tenor André Callegari saja ina buna strategia, da s’orientar vid las tecnicas cumprovadas da marketing e vendita: «Fundraising è marketing – ed il product è il sentiment d’avair sustegnì ina chaussa che fa segn.» Plinavant saja ina preschentaziun transparenta e conscienta impurtant – fundraising na saja numnadamain betg batlegiar. El recumonda perquai da sa scolar vinavant per avair ina maniera professiunala e dad avair uschia dapli success.
Plinavant saja central da far enconuschent il project en l’atgna rait da contacts. Uschia chattan ins tut tenor sustegniders en l’agen ravugl – e relaziuns persunalas èn ina part impurtanta per ch’in project gartegia. «Exercitai las cumpetenzas socialas, tgirai la rait da contacts, discutai voss giavischs e finamiras en l’agen conturn. Faschai las dumondas: Tgi enconuscha insatgi, che pudess gidar? Nizzegiai colliaziuns, finamiras sumegliantas, rabitschan ensemen la glieud. E surtut: avair plaschair!»
Ulteriurs links nizzaivels:
Dapli infurmaziuns davart differentas variantas per survegnir sustegn finanzial datti sin la pagina d’internet dal post spezialisà Vitamin B
https://www.vitaminb.ch/vereinsthemen/finanzen/mittelbeschaffung
Buns exempels per fundraising:
https://www.vitaminb.ch/vereinswissen/fundraising-vereine/
Isabelle Schmied (Traducziun : Flurin Clalüna)
