Novitads

Tipps 26.01.2024

<< enavos

La vusch durant l’enviern

L’enviern n’è betg il temp preferì da nus chantadur:as. Fraid, aria sitga e dafraid na fan betg bain a la vusch. Ma gist durant quest temp datti bleras occurrenzas per chantar: concerts d’advent, cults divins durant firads ecclesiastics ubain concerts da Bumaun. Dis fraids pon dentant laschar enavos fastizs betg giavischads sin nossa abilitad da chantar.

 

Sa tegnai chaud

Per che la vusch resta agila, èsi impurtant da resguardar ina u l’autra mesira. En emprima lingia è la temperatura las corp impurtanta. Purtai avunda vestgadira chauda, protegì il culiez cun in schal e purtai ina chapitscha per tegnair chaud il chau.

Cura ch’igl è propi fraid, gida da trair il flad tras il nas. Uschia vegn l’aria in pau pli umida avant ch’ella tutga las cordas vocalas. Quai sbassa il privel dad irritaziuns. In problem che chantadur:as na resguardan betg adina: Durant duas uras fan els provas en in local bain stgaudà. Lura van els en il liber e discurran là in cun l’auter. Per il nuf da la gula po quai esser in schoc! Ina mesira da precauziun: Purtai il chal davant la bucca ed il nas. Quai n’è betg propi elegant ed i sbassa il volumen da la vusch. I protegia ella dentant er in pau.

 

Bavai avunda

Er il da baiver gioga ina gronda rolla per mantegnair la vusch. Gist durant l’enviern è quai impurtant, surtut pervia dals locals stgaudads e l’aria sitga.

Bavai perquai avunda aua durant il di, uschia che la pel mucosa en la gula resta umida. Plinavant traguttan ins bler uschia. Ed il tragutter è l’incumbensa oriunda dal nuf da la gula e quai quieta el. Bavrondas chaudas sco té dad ervas pon dar in ulteriur levgiament ed purtar levgiament tar irritaziuns. Tar l’emprim  bricliez mussa té da salvgia effect.

 

Tge far sch’ins ha in dafraid?

Malgrà tut las mesiras da precauziun datti dentant adina puspè ch’ils fraid, virus ubain bacterias fan donn a la vusch. Las consequenzas èn raucadad u en il pli nausch cas ina inflammaziun dal nuf da la gula. La vusch rumpa, na vegn betg pli uschè aut e n’ha betg pli la medema briglianza. En uschè muments èsi impurtant da dar a la vusch ina pausa. Discurrì uschè pauc che pussibel, faschai regularmain pausas per las cordas vocalas. Plinavant stuessan ins desister da scutinar, cun quai che quai strapatscha la vusch anc pli ferm.

Sch’il mal il culiez na vegn betg d’in virus, lura pon ins ir a la prova, tadlar e chantar en il chau. Sch’ins ha dentant in infect, lura betg esser egoistic e betg partir il mal cun ils auters.

Er cun medischinas natiralas pon ins promover la guariziun. Sgargugliar (gurgeln) cun aua da sal po quietar il culiez cun franar l’infecziun. Cun inhalar vapur pon ins tegnair umid la via respiratorica ed mitigiar la raucadad. Vitiers pon ins dar intgins daguts dad ielis eterics che gidan da tegnair liber las bronchias. Sch’ils sintoms restan sur pli lung temp, ston ins ir tar ina persuna qualifitgada medicinalmain. In medi u ina media po valitar la situaziun e tut tenor prescriver medicaments effectivs.

 

Resumond pon ins dir che nus pudain far insatge per evitar che la vusch vegn strapatschà atras il fraid dal temp d’enviern. En il cas serius po la tgira correcta a la vusch gidar da guarir puspè spert.

Thierry Dagon (trad. Flurin Clalüna)