Novitads
<< enavos
DAVOS FESTIVAL Singwoche 2019
La quarta emna da chant dal DAVOS FESTIVAL ha gì lieu dals 11 fin 16 da favrer. Dus chors sa preparavan durant quel temp pel concert final en sonda. In dad els è il chor da chombra dal festival. A quel fan part 13 chantaduras e chantadurs professiunals. Els preparavan sut la direcziun da Marco Amherd in program fitg pretensius. Il segund chor era l’uschenumnà chor da project – in chor da 50 persunas, per gronda part laics. Era per els steva ina emna varianta plain provas e workshops sin il plan. Per garantir lur progress survegnivan els sustegn dals profis dal chor da chombra.
Uras da chant individualas
Ils participants dal chor da project han pudì profitar gist dubel da las chantaduras e chantadurs cun gronda experientscha. Per l’emprima giada han els purschì uras da chant individualas – mintgamai trais dad els durant dus dis. Ils laics han pudì perscrutar lur vusch e curreger in u l’auter sbagl da lur program. Mintga singula ura da chant era occupada. Sco ch’ils organisaturs scrivan: Sch’il numer da participants crescha vinavant, stoppian els dumandar a las magistras e magisters da chant da dar anc dapli uras.
Per chantar cun pajan ils participants mo 50.- francs, relativ pauc per tut la purschida. L’emna da chant sa finanziescha per gronda part l’associaziun da fauturs dal DAVOS FESTIVAL. Vinavant survegnan els sustegn da la vischnanca da Tavau, sco era autras uniuns e fundaziuns da la regiun.
Concert final
En sonda saira a las 20:00, ha gì lieu en la Pauluskirche a Tavau il concert final. Vestgì en nair s’èn preschentads ils bunamain 60 chantadurs ad ina baselgia plaina. Cun bler schlantsch e cun il toc «Viva la musica» da Iván Eröd han els avert il concert. Suenter trais ulteriuras chanzuns, è il chor da project ì da la vart, sin il palc restavan anc set chantaduras, sis chantadurs ed il dirigent Marco Amherd. Lur program cuntegna tocs da tut las epocas. Lur toc principal: «Songs of Ariel» da Frank Martin, in toc modern. Il chor da project sa smirvegliava: La pronunzia è clera, la dinamica è varianta, las silbas finalas èn bain ensemen.
Per l’ultima part dal concert è anc ina giada il chor da project vegnì sin il palc, per chantar anc las ultimas chanzuns da l’emna da chant 2019 dal DAVOS FESTIVAL. Per finir, sco agiunta, chantava il chor da chombra il toc «D’Chiäjeri» dal cumponist Eugen Meier dal Vallais. Cun quel toc melancolic mettevan els anc il punct sin l’i. L’ultim accord resuna, il dirigent sbassa ses mauns, intgins chantadurs surrian ed anc ina giada segua in grond applaus.
Photo: Flurin Clalüna
Photo: Flurin Clalüna
Flurin Clalüna
