Novitads
<< enavos
Tadlar, chantar e discutar – l’emprim Festival da la chanzun Rumantscha
Mantegnair e promover
Tenor Clau Scherrer, president da l’uniun «La Chanzun Rumantscha», è il stgazi da chanzuns dals Rumantschs sco ina bella planta en iert. Quella sto ins cultivar e mantegnair. Precis perquai vulan ses collegas ed el realisar mintga trais onns in festival perquai, mintga trais onns en ina autra regiun. Il festival dess era esser in inscunter interrumantsch. Vinavant speran els era sin novs impuls. Tranter auter era perquai ha lieu durant il festival ina concurrenza da cumponer.
L’idea per il festival ha Clau Scherrer gì schon avant intgins onns, cur ch’el passentava bler temp en la svizra franzosa. Là dettia era «festas da chanzuns” – e quai vuleva el era realisar per la Rumantschia.
Program variant
En tut stan nov occurrenzas sin il program, en venderdi saira ha lieu l’emprima dad ellas. Quella saira èn era chantauturs e chantauturs rumantschs en acziun, tranter els Astrid Alexander, Pascal Gamboni u Fiona Cavegn. En sonda ha lieu la concurrenza da cumponer. Trais chors chantan mintgamai quatter chanzuns novas, ch’ina giuria ha tschernì. Era il public astga eleger lur favurit. En sonda han anc lieu trais concerts, tranter els in concert da gala. Il chor da giuvenils «Incantanti» e «Cantus Firmus Surselva» chantan, vinavant suna la Brass Band Berner Oberland intgins arranschaments da chanzuns rumantschas.
La dumengia cumenza puspè pli calm. L’ultima occurrenza ha lieu vers mezdi. En ina discussiun da podium filosofeschan persunalitads da la cultura rumantscha davart «l’olma rumantscha e la situaziun generala dal chant e da la musica en terra rumantscha».
Tickets e dapli infurmaziuns: www.chanzunrumantscha.ch
Vinavant rapporta Radio Rumantsch en sonda live dal festival. En dumengia saira, las 17:25 mussa RTR sin SRF1 in Film davart il tema.
Flurin Clalüna
