Novitads
<< enavos
Di svizzer dals chors a Grono
Tut ha cumenzà cun in discurs tranter Jean-Marc Richard ed il president da la cumissiun da musica da l'Uniun svizra dals chors. Co fissi d'organisar in di da radio per ils chors svizzers? L'emprim hai gì num chattar ina data adattada per tut ils quatter radios involvids: Radio Rumantsch, Radio Svizzera Italiana, DRS 1 e RTS la Première. Cura che quella è stada fixada e tut ì fitg svelt. Alura èsi stà da chattar in chor en mintga regiun linguistica, chors cun profils fitg differents per mussar in maletg represchentativ. Il Chor da giuvenils grischun è stà l'emprim chor ch'è s'annunzià. El ha intgantà il public cun la clerezza da sias vuschs e cun la qualitad extraordinaria da sias preschentaziuns. Sut la direcziun da Martin Zimmermann han las giuvnas chantaduras ed ils giuvens chantadurs mussà prestaziuns remartgablas tranter auter cun tocs dal repertori rumantsch. L'energia incredibla da Margrit Leisibach Hausheer è stada da sentir er en ses Chor No Name da Ballwil. Lur repertori che sa cumpona surtut da chanzuns armonisadas en stil da jazz e da tocs africans ha dà al di in'autra tempra. Il Chant de Ville d'Estavayer-le-Lac, sut la direcziun da Thierry Dagon, ha preschentà tocs tipics e tradiziunals dal repertori romand per chors virils. In auter chor viril, I Cantori delle Cime, da Lugano, sut l'egida da Manuel Rigamonti, è s'avischinà cun plaschair ad in repertori alpin cun sias vuschs unicas. Per cumplettar il di cun tocs betg chorals ha il Duet Vivace cun Clara Ponzoni Borsani e Manuela Maffi Steger, che sunan mandolina e ghitarra, intgantà cun la raffinezza da lur preschentaziuns virtuusas. Tuttina sch'ellas han sunà in tango u ina musetta da valzer, lur stil ha impressiunà tuts. Cun lur musicalitad e preschientscha perfetga valan Flavio Caldelari, accordeon, e Neter Calafati cun raschun sco stailas al tschiel musical dal Tessin. Quest'entira varietad musicala è vegnida emessa la damaun en la show «Kiosque à Musiques» ed il suentermezdi è vegnida registrada in'emissiun naziunala quadrilingua sin tut ils quatter chanals. In bel maletg dal mund da chors che po avair lieu er en l'avegnir grazia als resultats da l'iniziativa No Billag!
Kantonaler Jugendchor Graubünden
No Name Chor
I cantori delle cime
Le Chant de Ville d’Estavayer-le-Lac
Thierry Dagon (Übersetzung: Isabelle Schmied)
